המאבק נגד הפלשתים בימי שמואל –
שמואל א’ ז’
ספר שמואל א פרק ז
(ו) ויקבצו המצפתה וישאבו מים וישפכו לפני ה’ ויצומו ביום ההוא ויאמרו שם חטאנו לה’ וישפט שמואל את בני ישראל במצפה:
(ז) וישמעו פלשתים כי התקבצו בני ישראל המצפתה ויעלו סרני פלשתים אל ישראל וישמעו בני ישראל ויראו מפני פלשתים:
(ח) ויאמרו בני ישראל אל שמואל אל תחרש ממנו מזעק אל ה’ אלהינו וישענו מיד פלשתים:
(ט) ויקח שמואל טלה חלב אחד ויעלה עולה כליל לה’ ויזעק שמואל אל ה’ בעד ישראל ויענהו ה’: (ויעלהו)
(י) ויהי שמואל מעלה העולה ופלשתים נגשו למלחמה בישראל וירעם ה’ בקול גדול ביום ההוא על פלשתים ויהמם וינגפו לפני ישראל:
(יא) ויצאו אנשי ישראל מן המצפה וירדפו את פלשתים ויכום עד מתחת לבית כר:
(יב) ויקח שמואל אבן אחת וישם בין המצפה ובין השן ויקרא את שמה אבן העזר ויאמר עד הנה עזרנו ה’:
(יג) ויכנעו הפלשתים ולא יספו עוד לבוא בגבול ישראל ותהי יד ה’ בפלשתים כל ימי שמואל:
(יד) ותשבנה הערים אשר לקחו פלשתים מאת ישראל לישראל מעקרון ועד גת ואת גבולן הציל ישראל מיד פלשתים ויהי שלום בין ישראל ובין האמרי:
